Род Сапегаў. Частка ІІІ.

У 1608 годзе Дзятлава стала ўладаннем другога знакамітага і вядомага ў ВКЛ роду – роду Сапегаў, герба “Ліс”. Свой радавод Сапегі вялі ад Нарымонта, сына Гедыміна. Займалі вышэйшыя дзяржаўныя, адміністратыўныя і вайсковыя пасады, былі буйнымі землеўладальнікамі. Асноўныя маёнткі знаходзіліся на Віцебшчыне.

Леў Іванавіч Сапега Леў Іванавіч Сапега
(4.4.1557-7.7.1633)
канцлер ВКЛ

Герб роду Сапегаў
Герб роду Сапегаў

Найбольш вядомым сярод Сапегаў быў Леў Іванавіч Сапега, канцлер ВКЛ, адзін са стваральнікаў Статута 1588 года, самага дасканалага зводу законаў на той час.

Нарадзіўся Леў Іванавіч Сапега 4 красавіка 1557 года ў маёнтку Астроўна Віцебскага ваяводства. Сямігадовым хлопчыкам яго аддалі бацькі ў нясвіжскую школу, што існавала пры двары вядомага князя – асветніка Мікалая Радзівіла Чорнага. Шмат часу юнак праводзіў у радзівілаўскай бібліятэцы. Хлопчык імкліва назапашваў веды.

У 13-гадовым узросце Леў Сапега разам з дзецьмі Мікалая Радзівіла Чорнага накіроўваецца ў Германію, у знакаміты Ляйпцыгскі ўніверсітэт. На радзіму ён вярнуўся недзе пасля 1572 года. Рэч Паспалітая тады перажывала цяжкія часы і малады Сапега актыўна ўключаецца ў палітычнае жыццё краіны. У 1581 – 1585 гадах ён ужо пісар вялікі ВКЛ, у 1585 – 1589 гадах - падканцлер, у 1589 – 1623 – канцлер ВКЛ, ваявода віленскі і адначасова гетман вялікі. У час бескаралеўя ў 1587 годзе прапаноўваў план федэрацыі Польшчы, Вялікага Княства і Маскоўскай дзяржавы з адным каралём. У 1600-1601 гадах узначальваў пасольства ў Маскву, але дзяржаўнай уніі з Масквою не дамогся. У сваёй палітыцы адстойваў суверэнітэт ВКЛ, няўхільна прытрымліваўся 12-га артыкула 3-га раздзела Статута ВКЛ 1588 года, які забараняў раздаваць польскай шляхце маёнткі і пасады ў Вялікім Княстве Літоўскім. Памёр Леў Іванавіч Сапега ў Вільні 7 ліпеня 1633 года на 77-м годзе жыцця. Быў пахаваны ў касцёле святога Міхаіла Архангела.

Надгробны знак Л. Сапегі Надгробны знак Л. Сапегі
Yandex cite